Creaduriaid yr ardd

Yn ddiweddar (fel sawl un arall) dwi ddim wedi bod yn crwydro’n bell, a gan fy mod yn cael trafferth cerdded am hir (cricmala yn y clun) dwi wedi bod yn treulio mwy o amser yn gwylio natur gwyllt yr ardd na natur gwyllt y comin.  Mae’r pwll bach yn llawn o benbyliaid rŵan, a rhai ohonon nhw yn brysur yn troi’n lyffantod, a digonedd o lyffantod o gwmpas yr ardd.  Dyma un a oedd yn neidio o gwmpas prynhawn ddoe.  

A mae’r pwll yn sicr yn diddori fy ŵyr bach sydd yn treulio amser wrth yr ochr yn chwilio am lyffantod.

Mae draenog wedi bod yn ymweld a ni am amser hir.  Falle mwy nag un - anodd weithiau gwahaniaethu rhwng draenogod!  Beth sy’n dda ydy bod draenogod yn ymweld a sawl gymydog.  O'r diwedd dwi wedi llwyddo i gael llun ohono un ohonyn nhw, ty allan i'r ardd.  Ond methais cael llun da.  Roedd pennod 6 o Natur a Ni yn cynnwys dipyn am ddraenogod.

A dyma llun o un yn bwydo wrth y drws

Dan ni ddim yn siŵr faint o ddraenogod sydd yn dod i’r stryd, ond trwy roi camera allan trwy’r nos cafodd ein cymydog drws nesa cip o lwynog a draenog gyda’i gilydd. Does dim modd rhoi'r llun yn fama yn anffodus.   Dwi heb gweld llwynog eto - maent yn dod gyda’r nos - ond bob tro dwi'n deffro yn y nos (rhy amal) dwi'n edrych allan o'r ffenestr, rhag ofn!.

Creadur arall sydd yn byw yn yr ardd ydy llygoden bach sydd yn dod allan weithiau min nos i fwyta hadau.  Ond mae’n andros o anodd cael llun.  Mae hi’n rhedeg o gwmpas fel y gwynt - dyma cip bach.

Ac wrth gwrs, mae ieir bach yr ha yn brysur rŵan, yn cynnwys rhai prydferth fel hon: comma yn Saesneg.

Rhaid darganfod yr enw Cymraeg.  Ddoe, wrth eistedd yn yr ardd gyda’r teulu ar ôl cinio Sul, daeth barcud coch drosodd.  ’Roedd y camera bach gen i, ond doedd dim modd cael llun da - ’roedd rhy gyflym.

Ond am ffodus bod yr aderyn yma yn eitha gyffredin y dyddiau yma.